इन्द्रेणी
१९ फाल्गुन २०८२, मंगलवार ०७:१८ दिपक के.सी., काठमाडौँ । तराईका विभिन्न जिल्लामा आज फागु पूर्णिमाको दोस्रो दिन रंगहरूको पर्व होली उल्लास र उत्साहका साथ मनाइँदै छ। पहाडी तथा हिमाली क्षेत्रमा हिजो मनाइएको होली आज तराईका जिल्लामा विशेष उत्साहका साथ मनाउने परम्परा रहँदै आएको छ।
मधेश प्रदेश का जिल्लाहरू धनुषा, महोत्तरी, सर्लाही, रौतहट, बारा, पर्सा लगायतका स्थानमा बिहानैदेखि युवायुवती, बालबालिका र सर्वसाधारण एकअर्कामा अबिर र रंग दलेर शुभकामना आदानप्रदान गरिरहेका छन्। बजार क्षेत्र, चोक–चौराहा र बस्तीहरूमा समूह–समूहमा नाचगान, बाजागाजा र पानीका फोहोरासहित होली खेल्ने क्रम जारी छ।
त्यस्तै लुम्बिनी प्रदेश र कोशी प्रदेश अन्तर्गतका तराई जिल्लाहरूमा पनि होलीको रौनक देखिएको छ। स्थानीय प्रशासनले मर्यादित र सुरक्षित रूपमा पर्व मनाउन आग्रह गर्दै सुरक्षा व्यवस्था कडा पारेको जनाएको छ। सम्भावित अवाञ्छित गतिविधि रोक्न मुख्य बजार र भीडभाड हुने स्थानमा सुरक्षाकर्मी परिचालन गरिएको छ।
होलीलाई आपसी सद्भाव, भाइचारा र एकताको पर्वका रूपमा लिइन्छ। विभिन्न समुदाय, धर्म र संस्कृतिका मानिसहरू एकआपसमा रंग साटासाट गर्दै मनमुटाव बिर्सने र नयाँ सम्बन्ध सुदृढ गर्ने अवसरका रूपमा यस पर्वलाई लिने गरिन्छ।
यसैबीच, मदिराजन्य पदार्थको दुरुपयोग, जबर्जस्ती रंग दल्ने तथा अवाञ्छित हर्कत नगर्न प्रशासनले सर्वसाधारणलाई सचेत गराएको छ। सडक सुरक्षालाई ध्यानमा राख्दै सवारी साधन सावधानीपूर्वक चलाउन ट्राफिक प्रहरीको आग्रह छ। तराईका जिल्लामा साँझसम्म होलीको रौनक जारी रहने अनुमान गरिएको छ।