इन्द्रेणी
२३ फाल्गुन २०८२, शनिबार १०:३९ कर्णालीमा(नेकपा)को बलियो उपस्थिति, जनताले विकास र स्थिर नेतृत्वलाई दिए साथ
दिपक के.सी.,काठमाडौं
कालीकोटबाट प्रतिनिधिसभा सदस्यमा नेपाल कम्युनिष्ट पार्टी (नेकपा) का उम्मेदवार महेन्द्र बहादु शाही विजयी भएका छन्। अन्तिम मतपरिणाम अनुसार उनले आफ्ना मुख्य प्रतिस्पर्धी उम्मेदवार नेकपा एमालेका उम्मेदवार नगिन्द्र शाहीलाई पछि पार्दै उनले ११३३८ मत सहित प्रतिनिधिसभामा स्थान सुरक्षित गरेका हुन्।
निर्वाचन अधिकृतको कार्यालयले सार्वजनिक गरेको विवरणअनुसार मतगणनाको सुरुवातदेखि नै अग्रता कायम राखेका शाहीले अन्तिमसम्म सो अग्रता कायम राख्दै विजय हासिल गरेका हुन्। कालीकोटमा यसपटक विभिन्न राजनीतिक दलका उम्मेदवारहरूबीच कडा प्रतिस्पर्धा भएको थियो।
नेपाल कम्युनिष्ट पार्टी (नेकपा) का प्रभावशाली नेतामध्ये एक मानिने शाहीले चुनावी अभियानका क्रममा कर्णालीको विकास, सडक तथा भौतिक पूर्वाधार विस्तार, शिक्षा र स्वास्थ्य सेवाको पहुँच वृद्धि तथा रोजगारी सिर्जनालाई प्रमुख एजेन्डाका रूपमा अघि सारेका थिए। ती एजेन्डा प्रति मतदाताले भरोसा देखाउँदै उनलाई जिताएको विश्लेषण गरिएको छ।
मतपरिणाम सार्वजनिक भएसँगै कालीकोटका विभिन्न स्थानमा समर्थकहरूले खुसीयाली मनाएका छन्। विजय जुलुस निकाल्दै समर्थकहरूले अबिर दल्दै जितको उत्सव मनाएका छन्।
विजयपछि प्रतिक्रिया दिँदै शाहीले आफूलाई विश्वास गरेर विजयी बनाउने सम्पूर्ण मतदाताप्रति आभार व्यक्त गरेका छन्। उनले जनताको अपेक्षा अनुसार काम गर्दै कालीकोट र समग्र कर्णाली प्रदेशको विकासका लागि निरन्तर प्रयास गर्ने प्रतिबद्धता व्यक्त गरेका छन्।
शाहीले भने, “कालीकोटका जनताले ममाथि गरेको विश्वास ठूलो जिम्मेवारी हो। क्षेत्रको विकास, शिक्षा, स्वास्थ्य र रोजगारीका क्षेत्रमा ठोस काम गर्दै जनताको भरोसा कायम राख्नेछु।”
कर्णाली प्रदेशका पुर्व मुख्यमन्त्री समेत रहेका शाही कर्णाली प्रदेशको राजनीतिमा प्रभावशाली नेताका रूपमा चिनिन्छन्। कालीकोटबाट उनको विजयलाई कर्णालीको राजनीतिमा महत्वपूर्ण उपलब्धिका रूपमा हेरिएको छ।