इन्द्रेणी
२४ फाल्गुन २०८२, आईतवार ०८:४७ दिपक के.सी.,काठमाडौं ।
प्रतिनिधि सभा निर्वाचन अन्तर्गत इलाम क्षेत्र नं.–२ मा नेकपा एमालेका तर्फबाट २२,४२६ मत सहित सुहाङ नेम्वाङ विजयी भएका छन्। नेकपा एमाले का उम्मेदवार नेम्वाङले प्रतिस्पर्धी दलका उम्मेदवार नेपाली काँग्रेसका उम्मेदवार भेषराज आचार्य लाई पछि पार्दै प्रतिनिधि सभा सदस्यमा निर्वाचित भएका हुन्।
मुख्य निर्वाचन अधिकृतको कार्यालयका अनुसार मतगणनाको अन्तिम परिणाम सार्वजनिक हुँदा नेम्वाङले उल्लेख्य मत प्राप्त गर्दै विजय सुनिश्चित गरेका हुन्। उनका निकटतम प्रतिद्वन्द्वीहरूबीच कडा प्रतिस्पर्धा भए पनि अन्ततः मतदाताले नेम्वाङलाई आफ्नो प्रतिनिधिका रूपमा चयन गरेका छन्।
नेम्वाङ विजयी भएको घोषणा भएपछि इलामका विभिन्न स्थानमा एमालेका कार्यकर्ता तथा समर्थकहरूले उत्साहपूर्वक विजय उत्सव मनाएका छन्। समर्थकहरूले बाजागाजा बजाउँदै, नाराबाजी गर्दै र एकअर्कालाई अबिर लगाएर खुशी साटासाट गरेका छन्।
विजयी भएपछि सञ्चारकर्मीसँग प्रतिक्रिया दिँदै सुहाङ नेम्वाङले मतदाताप्रति आभार व्यक्त गर्दै इलाम–२ को समग्र विकासलाई प्राथमिकतामा राखेर काम गर्ने प्रतिबद्धता जनाएका थिए। उनले भने, “इलामका जनताले ममाथि गरेको विश्वासलाई म सम्मानपूर्वक स्वीकार गर्छु। यस क्षेत्रको पूर्वाधार विकास, कृषि प्रवर्द्धन, पर्यटन र रोजगारी सिर्जनामा विशेष ध्यान दिनेछु।”
इलाम–२ मा चुनावी अभियानका क्रममा सडक पूर्वाधार, कृषिको आधुनिकीकरण, चिया उद्योगको प्रवर्द्धन तथा पर्यटन विकास प्रमुख मुद्दाका रूपमा उठेका थिए। विश्लेषकहरूका अनुसार स्थानीय विकासका एजेन्डा र संगठनात्मक मजबुत आधारका कारण नेम्वाङले मतदाताको विश्वास जित्न सफल भएका हुन्।
निर्वाचन आयोगका अनुसार इलाम–२ का मतदान केन्द्रहरूमा मतदान शान्तिपूर्ण रूपमा सम्पन्न भएको थियो। मतगणना प्रक्रिया पनि सुरक्षा व्यवस्थासहित व्यवस्थित रूपमा सञ्चालन गरिएको थियो।