इन्द्रेणी
२४ फाल्गुन २०८२, आईतवार ११:०१ दिपक के.सी,काठमाडौं ।
अन्तर्राष्ट्रिय क्रिकेटको प्रतिष्ठित प्रतियोगिता टि–२० पुरुष कृकेट विश्वकप अन्तर्गत आज फाइनल खेलमा भारत र न्युजील्याण्ड बिच उपाधिका लागि आमनेसामने हुँदैछन्। विश्वभरका क्रिकेट समर्थकको ध्यान तानेको यो रोमाञ्चक भिडन्त भारतको अहमदाबादस्थित साँझ ७ः१५ बजे नरेन्द्र मोदी स्टडियममा हुँदैछ।
विश्वकै ठूलो क्रिकेट रंगशाला मानिने उक्त मैदानमा हजारौँ दर्शकको उपस्थितिमा खेल हुने अपेक्षा गरिएको छ। खेल नेपाली समयअनुसार राति हुने तालिका रहेको छ।
भारतको लक्ष्य – कीर्तिमानी उपाधि
फाइनलमा उत्रिएको भारत प्रतियोगिताभर उत्कृष्ट लयमा देखिएको टोली हो। सेमिफाइनलमा भारतले इङल्याण्ड लाई पराजित गर्दै फाइनलको यात्रा तय गरेको थियो।
भारतीय टोली आक्रामक ब्याटिङ र सशक्त बलिङका कारण यसपटक पनि उपाधिको बलियो दाबेदार मानिएको छ। टोलीमा टिम क्याप्टेन सुर्य कुमार यादव, हार्दिक पाण्ड र जस्पृत बुम्राह जस्ता खेलाडीको प्रदर्शन महत्वपूर्ण हुने अपेक्षा गरिएको छ।
न्युजिल्याण्डको लक्ष्य – पहिलो टी–२० विश्वकप
अर्कोतर्फ न्युजिल्याण्ड पनि इतिहास रच्ने लक्ष्यसहित मैदानमा उत्रने तयारीमा छ। सेमिफाइनलमा न्युजिल्याण्डले अत्यन्तै बलियो टिम साउथ अफ्रीका लाई पराजित गर्दै फाइनलमा स्थान बनाएको थियो। टोलीका कप्तान मिट्चेल स्यान्टनेरको नेतृत्वमा रहेको न्युजिल्याण्डले प्रतियोगिताभर सन्तुलित प्रदर्शन गरेको छ। टोलीमा विलीयमसन, डेभन र ट्रेन् बोल्ट जस्ता अनुभवी खेलाडी छन्।
रोमाञ्चक प्रतिस्पर्धाको अपेक्षा
क्रिकेट विश्लेषकहरूले आजको फाइनल निकै प्रतिस्पर्धात्मक हुने अनुमान गरेका छन्। बलियो ब्याटिङ लाइनअप भएको भारत र अनुशासित टोलीको रूपमा परिचित न्युजिल्याण्डबीचको भिडन्तले क्रिकेट समर्थकलाई रोमाञ्चक खेलको अनुभूति दिलाउने अपेक्षा गरिएको छ। आजको खेलले नयाँ इतिहास लेख्ने सम्भावना रहेको भन्दै विश्वभरका समर्थकले उत्सुकताका साथ फाइनलको प्रतीक्षा गरिरहेका छन्।